«Տիգրան Սարգսյանի ժառանգությունը շատ տխուր է, ըստ էության ես նույնիսկ կարող եմ ասել դատարկ բյուջե, ապագա չներշնչող, վստահություն չներշնչող, մի տնտեսություն, որտեղ ներդրումներ անողներ չկան, տնտեսության մեջ, որտեղ հիասթափություն կա բիզնեսի նկատմամբ, որեւիցե, այսպես ասեմ, հավասար վերաբերմունք չկա:Մի խոսքով՝ ամենավատ վիճակում, բառերն էլ դժվար եմ ընտրում»,- ԳԱԼԱ-ի լրագրողի հետ զրույցում ասաց ՀԱԿ ներկայացուցիչ, տնտեսագետ Վահագն Խաչատրյանը՝ պատասխանելով մեր այն հարցին, թե ինչպիսի «ժառանգություն» թողեց Տ. Սարգսյանը իրեն փոխարինողին: Սակայն այս ամենին զուգահեռ Տ. Սարգսյանի անձնական միջոցները անցնող տարիների ընթացքում կտրուկ աճեցին: «Այս տարիների ընթացքում ամենամեծ լավությունը, որ արել է, դա իր եւ իր մոտ շրջապատի անձնական սեփականությունը մեծացնելն է եղել: Այս բոլոր «տնտեսական աճերը» եւ այլն, որ ներկայացվել է, դրանք ընդամենը վերաբերել են իրենց: Ես եւ իմ համախոհները միշտ առիթ ենք ունեցել ասելու, որ այս քաղաքականությունը, որ վարվում է ՀՀ-ում, իր պաշտոնավարության ժամանակաշրջանում, դա կործանարար է, եւ Հայաստանի նման պետությունը չի կարող դիմանալ անհավասար մրցակցային պայմաններում, տնտեսության ազատության սահմանափակումների պարագայում Հայաստանը չի կարող զարգանալ»,- ասաց տնտեսագետը: Վ. Խաչատրյանի խոսքերով՝ Տ. Սարգսյանի առջեւ դրված չի եղել երկրի տնտեսության զարգացումը, այլ իշխանության մոտ կանգնած քաղաքական ուժերի, տնտեսվարողների եկամուտները ավելացնելը:
Իսկ Տիգրան Սարգսյանը Հայաստանի 12-րդ վարչապետն էր, ով կառավարությունը ղեկավարեց 6 տարի: Այդ պաշտոնում իր երկարակեցությամբ նա երկրորդն էր Անդրանիկ Մարգարյանից հետո, ով գործադիր իշխանությունը ղեկավարեց շուրջ 7 տարի: 2008 թվականին, երբ Տիգրան Սարգսյանը նշանակվեց վարչապետի պաշտոնում, երկրում համախառն արդյունքի աճը կազմեց 6.8 տոկոս, որը նախատեսվածից մի քանի անգամ ցածր էր: Իսկ 2009 թվականին արձանագրված համաշխարհային տնտեսական ճգնաժամը զգալի հարվածներ հասցրեց նաեւ Հայաստանի տնտեսությանը: Երկրի տնտեսությունը անկում ապրեց շուրջ 15 տոկոսով: Եվ չնայած այս հանգամանքին՝ արդեն նախկին վարչապետը պարբերաբար հայտարարում էր, թե ֆինանսատնտեսական ճգնաժամը հաղթահարված է եւ որ այն գնացել է մեր երկրից: Մինչդեռ սոցիալ-տնտեսական ծանր իրավիճակը մեղմելու ուղղությամբ քայլեր այդպես էլ չձեռնարկվեցին: Երկրում առկա համատարած աղքատության, գործազրկության մակարդակի բարձր պայմաններում, սակայն, անցնող տարիներին Տ. Սարգսյանի անձնական միջոցները շեշտակի աճեցին: Այսպես, երբ 2008 թվականին Սարգսյանը նշանակվեց Հայաստանի վարչապետ, իր ներկայացրած հայտարարագրի համաձայն նա անձնական հաշիվներում ունեցել է 17 միլիոն 247 հազար դրամ եւ 22 հազար դոլար: 2009 թվականին նա արդեն ուներ 17 միլիոն 247 հազար դրամ եւ 22 հազար 116 դոլար: Իսկ ահա 2011 թվականի վերջին Տ. Սարգսյանի դրամական միջոցները կտրուկ ավելացան՝ կազմելով 35 միլիոն դրամ եւ 859 հազար դոլար: Ի դեպ, հրապարակումների համաձայն, օրինակ, այդ տարի նրան եկամուտ էր բերել նաեւ 3 միլիոն 334 հազար 80 դրամ աշխատավարձը, 211 հազար դրամ՝ դասախոսությունից ստացած վճարը, ինչպես նաեւ 3 տարբեր ավանդներից ստացած տոկոսավճարները, համապատասխանաբար` 12 մլն 30 հազար, 214 հազար 221 եւ 16 միլիոն 897 հազար 257 դրամ:
