Իրանում զանգվածային ցույցեր են` այրել են ԱՄՆ դրոշը

Իրանում այսօր զանգվածային հակաամերիկյան ցույցեր են անցկացվում, որի ընթացքում արդեն այրել են ԱՄՆ դրոշը: Դրանք կազմակերպվել են երկրի իշխանությունների կողմից 1979 թ. Թեհրանում իսլամական հեղափոխական ուսանողների կողմից ԱՄՆ դեսպանատան գրավման տարելիցի կապակցությամբ:

Համաշխարհային իմպերիալիզմի դեմ ազգային պայքարի օրը, ինպես և անցած տարիներին, Իրանի քաղաքների փողոցներով երթեր են ընթանում ի հիշատակ պատմական իրադարձության: Ցույցի մասնակիցները նաև հակաիսրայելական կոչեր են հնչեցնում: Իրանի մայրաքաղաքում ցույցը մեկնարկել է երկրում ԱՄՆ դեսպանատան դատարկ շենքի մոտից:

«ԱՄՆ-ն այժմ էլ է մնում Իրանի ազգի թիվ մեկ թշնամին»,- ասվում է Իրանի Իսլամական Հանրապետության ԶՈՒ Գլխավոր շտաբի կիրակի օրը հրապարակված հայտարարության մեջ: Հայտարարության մեջ նաև ընդգծվում է, որ «նոյեմբերի 4-ը (իրանական օրացույցով աբանայի 13-ը) խորհրդանշում է իրանական ազգի` իմպերիալիզմի դեմ պայքարում դրսևորած անկոտրում կամքն և դիմադրությունը»:

1979 թ. նոյեմբերի 4-ին` Իրանի իսլամական հեղափոխությունից 9 ամիս անց, երիտասարդությունը գրավել է Թեհրանում ԱՄՆ դեսպանատունը: Շուրջ 60 ամերիկացի դիվանագետներ և նրանց ընտանիքի անդամներ 444 օր գերի են պահվել և ազատ են արձակվել միայն 1981 թվականի հունվարին:

1980 թ. ապրիլ ամսին Պենտագոնն ու ԿՀՎ քայլեր են ձեռնարկել գերիների ազատ արձակման ուղղությամբ: Պարսից ծոցի «Նիմից» ավիաբազայից Թեհրան են ուղևորվում հատուկ ջոկատայինների ուղղաթիռներ: Սակայն «Արծվի մագիլներ» օպերացիան տապալվել է. Տաբաս անապատում ուղղաթիռներն ընկել են ավազե փոթորկի մեջ, 2 ուղղաթիռներ խափանվել են, ևս մեկը շեղվել է թռիչքի ուղղությունից:

Վերջնականապես հրաժարվել գերիների ազատագրման մտքից ամերիկացիներին ստիպել է միջադեպը, երբ ուղղաթիռներից մեկը բախվել է լցավորող ուղղաթիռի հետ և երկու թռչող սարքավորումներն էլ այրվել են, 8 «Դելտա» հատուկ ջոկատայիններ զոհվել են, ևս 4-ը ստացել են լուրջ այրվածքներ: